Eph 5 | PONPDN | STEP | KOMAIL kaalemoni Kot dueta seri kompok kan.

Ephesians 5

1 KOMAIL kaalemoni Kot dueta seri kompok kan. 2 O kekeid ni limpok dueta Kristus, me kotin, pok on kitail, ap kotin sokonpaude kin kitail, pwen wiala kisakis o mairon eu, me kin pomau on Kot. 3 A nenek, o son en saut karos, o norok kapwa ender man pwaida re omail, duen me kon on saraui kan. 4 Pil der lokaia sued, o kaman, o lokaia mal, me sota kon on, a iet: Komail en danke. 5 Mepukat komail en asa o dedeki, me sota me nenek, de samin, de me norok kapwa, me poni ani tikitik, pan kak sosoki wein Kristus o Kot. 6 Sota amen en kotau ki komail lokaia mal, pwe mepukat kin kareda onion en Kot on seri sopeik kan. 7 Komail ender kis arail. 8 Pwe mas o komail me rotorot, a met komail marainlar ren Kaun o; weweid wei duen seri en marain akan. 9 Pwe wan marain mepukat: Kamau, o pun o melel. 10 O kasauiada, me kin kaperenda kupur en Kaun o. 11 O der waroki on wiawia sued en me rotorot akan, a mak eta, en kapun on irail. 12 Pwe me re kin wiada wasa rir, me sued o sota mau on, en inda. 13 A karos me pan kasansaleda, pan kadiarok kida marain, pwe marain kin kasansaleda meakaros. 14 I me a kotin masani: Pirida koe me mamair, o paurida san ren me melar akan, a Kristus pan kamarain uk ada. 15 Kalaka, pwe komail en keid ineneweita, kaidin duen me lolepon a duen me lolekon kan. 16 Audaud ansau mau, pweki ran akan me sued. 17 Komail ari ender lamponla, a en lolekon, pwe i duen kupur en Kaun. 18 Ender kamom wain, pwe a kin kareda tiak sued, a komail en direki Nen. 19 O sauas pena ki psalm, o kaul en kapin, o kaul nenin; komail kaul o kasan on Kaun o nan monion omail. 20 Danke kaukaule Kot o Sam ni mar en atail Kaun Iesus Kristus. 21 O papa komail pena amen amen ni masak dol en Kristus. 22 Komail li akan, udi on pein omail warok kan dueta on Kaun. 23 Pwe ol o me tapwin a paud, dueta Kristus me tapwin momodisou, o i me Saunkamaur pan war a. 24 A duen momodisou kin udi on Kristus, iduen li akan en udi on ar warok kan ni meakaros. 25 Komail ol akan pok on pein omail warok kan, dueta Kristus kotin pok on momodisou o kotiki don i pein i. 26 Pwen kasarauiala i, o kamakelekeleda i ki pil o, iei a masan. 27 Pwen kasansale don pein i momodisou linan, me sota topala o omrok ape, a me saraui o so kaopa kot. 28 Nan iduen ol akan en pok on ar warok kan dueta pein war arail akan. Me kin pok on a warok, kin pok on pein i. 29 Sota amen kin suedeki pein uduk a; pwe a kin kamana o kanainai eta, dueta Kristus kin kotin apwali momodisou. 30 Pwe kitail me kasan en war a, o uduk a, o a kokon akan. 31 I me aramas o pan muei san sam a o in a, ap muei on a paud, ira ari pan uduk ta ieu la. 32 Meid kaponepon lapalap eu; a nai kaparokki duen Kristus a warokeki on momodisou. 33 Pil dueta komail, amen amen komail en pok on a warok dueta pein i, a li o en kakaki a warok.